Tuesday, October 18, 2011

أعزائي المعتقدين (إني دايما مبسوط) أو (مصمم على الفرح) أو المتسائلين (انتا ليه مبسوط) ..

كان فيه وخلص ..

أنا (مش دايما مبسوط) (ومش مصمم على الفرح) وبالنأكيد (عارف دلوقت زعلان ليه)..

وغالبا أقدر أقول وضميري مرتاح إني في نوبة اكتئاب صغيرة بنت حلال، لسه معديتش أسبوعين عشان تبقا (نوبة اكتئاب كبرى)، وإن كان معدل تكرارها في الفترة الاخيرة بيزيد بردو، ودي مشكلة إنك تبقا دكتور أساسا..

(الأطباء أكثر عرضة للإكتئاب، ومعرضين للانتحار والإدمان بمعدل 3 أضعاف غيرهم من أصحاب المهن الأخرى)

وكالعادة بما إني شخص معقد، هرتاح شوية لما اكتب الكلمتين دول، عشان كده كتبتهم، وفي نفس الوقت مش هرتاح للتمديد على الشيزلونج والفضفضة السينمائية المعتادة بداية من (احكيلي عن طفولتك) مرورا ب (لو فضفضت شوية هترتاح) ل (كلنا بنعدي بالحالة دي) ل (دي أهمية الصحاب) ل (غير جو) ل (حاول تكتب اللي مضايقك عشان تتخطاه) ..

ودا الوقت اللي أعلن فيه للمرة المليون عدائي للإكلشيهات في المواقف الشبيهة بدي للي مخدش باله فقط لا غير ..

ودا يطرح سؤال جوهري لولبي حزلئومي ..
(عاوز مننا ايه بميتين أهلك؟)

والإجابة بسيطة خالص: مش عاوز أي حاجة (بردو بميتين أهلي) ..

مجرد شوية لك ينقعوا بنج موضعي لحين تغير الحال فقط لا غير..
بالإضافة لأن الحالة دي بتطلب معايا كتابة ..

حل الموضوع دا معايا غالبا بيبقا الوقت، وكتابين كويسين، وشوية كتابة، ودا متاح جدا ولله الحمد ..

وأنا بكتب دلوقت خدت بالي من فايدة تانية كمان: إن لو كل الناس عارفة دا، على الأقل هيبقا مفهوم لو كنت سخيف مع حد في اليومين الجايين، ودا نوعا ما هيفيد إني محسش أوي بالذنب..

هحاول أبعد عن إكلشيهات سابقة مع الاكتئاب من نوعية (قفل صفحة الفيس)، (قفل الموبايل) .. الخ ..

ودي فايدة تانية بردو (أيام أون فاير) ..
يمكن أبقا بحرج نفسي إني أبعد عن نفس الأكلشيهات السابق ذكرها على طريقة (انتا اللي قلت مش هتقفل أم الفيس ولا أم الموبايل) ..

وبما ان دي كانت مجرد ستيتس وربنا طرح فيها البركة وكبرت، فلتكن دوكيومينت أو نوت، وبارك الله فيما رزق..

6 comments:

P A S H A said...

اقرأ "ترانيم في ظل تمارا" لـ محمد عفيفي - دار الهلال
:)

الإستشارة كمان أسبوع هاعدي أتطمن عليك

سلام

shady said...

قريتها من زمان بالفعل

تسلم

candy said...

كسفتنى :*)

النصايح دى اللى دايما بقولها
:I

عموما فعلا موضوع كتب
ومزيكا جديد جميلة
ومشروب سخن جديد
وقفل التليفون دا للأسف لم يكشتف العلم بديل له بعد .. لازمن ولابد

ممكن أظبطلك روشتة على ذوقى

رواية الصلوات تبقى واحدة
رواية تركى موجودة فى مكتبة الشروق

أو ممكن
قصص مصطفى محمود
أو القصص الفلسفية بتاعت توفيق الحكيم
(غالبا هو كمان كاتبهم فى دور اكتئاب عبقرى)
زى عهد الشيكطان أو أرنى الله

وممكن زغازيغ لأحمد خالد توفيق

__

المشروبات

عليك بكل البن أو تحويجات غريبة
أو الكابتشينو بأنواعه
المهم تكون حاجة (سخنة - بوش كثيييييييف - بُن)

__
المزيكا
فى كتير بس جرب حاجة ماسمعتهاش قبل كدة
زى
http://www.youtube.com/watch?v=pqlToZGY_vQ
أو
http://www.youtube.com/watch?v=A0rRvbmfQSY
أو حديث بقى
http://www.youtube.com/watch?v=oujPG7dAO_c
أو
http://www.youtube.com/watch?v=T97t-4YkfMo
أو أى حاجة امنير ماسمعتهاش قبل كدة
:)
____
لو نجحت ... ادعيلى

Rana said...

"تزامُن"
يا رفيق الكفاح :)

P A S H A said...

يا رب تكون أحسن دلوقت

shady said...

أحسن الحمد لله