وقف ببساطة فوق كتبه
وورقه وقلمه
وبنفسه
ربط موال ف سقف الحلم
وبص ل بكره بصة لوم
وخد نفَسه
و مستناش كلام تاني
دخل برقبته مواله
ونط بعيد عن امبارح
شنق نفسه
ملعون أبو الدنيا
ما اللعن حكم عليها
حتي في اسمها
(دنيا)
شئ اختلف لما شتمت ؟
كان أولي دايما يختلف
لما ضحكت
ضحكة .. سلف
وبرده يومها لعنتها
مستني إيه منها بقا
غير تيجي طالبة ضحكتك
غير تنسلت في الحبر الأزرق والورق
غير تسلخك
و ترش باقي الفرحة ملح
*****
تلعن أبوها ليه ؟
ملعون أبو قلبك ..
إديت لدا حتة
وإديت لدي حتة
حتي (صباح الخير)
و (سلام) أو (إزيك)
ما بقاش لهم حتة
مليان أوي قلبك
مفيش مكان فاضي
خد شنطتك واخرج
بأمر م القاضي
*****
تلعن ابوها ليه
اخترت حلمك هش
جمع الطوابع كان هوايتك
وكتاب بريحته .. متفتحش
وصورة نونو لطفل لازم يبتسم ..
مكبرش
وكلام في شعر
كتير اوي مابيتسمعش
بنيته ليه من ورق ..
وقلت له متطيرش
*****
إلعن أبوها كمان
والشجن باقي
والساعة ماشية فوق سنينك
والثانية .. مبترجعش
اشتم بصوت عالي
فوق كلاكسات الشوارع
والكاسيتات و الوجع والوَش
والدنيا مبتسمعش